თაობები იკვლევდნენ ტაო-კლარჯეთის რეგიონს. არაერთი მეცნიერი მუშაობს დღესაც. თითქმის საუკუნე-ნახევრის შრომის შედეგად დიდძალი ინფორმაცია დაგროვდა.

ამ ინფორმაციის თავმოყრისა და ერთიან საცნობარო ლიტერატურად ქცევის დროც დადგა.

ძალზე ბევრი რამ გამოიცა ტაო-კლარჯეთის შესახებ, ძველად თუ თანამედროვე ეპოქაში, მაგრამ ძეგლთა ერთიანი კატალოგის პირველად გამოცემის ბედნიერება და პატივი ჩვენს ჯგუფს – სამხრეთ კავკასიისა და ანატოლიის კვლევის ცენტრს – ერგო.

პროექტი „ტაო-კლარჯეთი – ისტორიისა და კულტურის ძეგლები (გეოინფორმაციული სისტემა და ინტერაქტიური ვებ-რუკა)“ რუსთაველის ფონდის დაფინანსებით, 2014-2016 წლებში განხორციელდა.

პროექტის ფარგლებში გაკეთდა ტაო-კლარჯეთის ისტორიისა და კულტურის ძეგლთა ონ-ლაინ ბაზა და გამოიცა აღნიშნული კატალოგი.

600-გვერდიანი წიგნი შემდეგი ნაწილებისაგან შედგება:

ისტორიისა და კულტურის ძეგლები (კატალოგი),

ტაო-კლარჯეთთან დაკავშირებული ხელნაწერები და ისტორიული დოკუმენტები (კატალოგი),

ტაო-კლარჯეთთან დაკავშირებული ისტორიული პირები (ენციკლოპედიური ლექსიკონი),

ისტორიული პუნქტები (ცნობარი – თანამედროვე ადმინისტრაციული ერთეულების, საერთო ანბანზე გაწყობილი ძველი და თანამედროვე სახელების მიხედვით),

ბიბლიოგრაფია.

ისტორიულ ძეგლთა კატალოგის სტრუქტურა ასეთია: მონასტრები, ეკლესიები, ციხე-სიმაგრეები. მონაცემები წარმოდგენილია ისტორიული პროვინციების მიხედვით:

სპერი, ტაო, კლარჯეთი, შავშეთი, აჭარა (მაჭახლის ხეობა), ლაზეთი („ზღვისპირი“), კოლა, არტაანი, ერუშეთი, ჩრდილი, ჯავახეთი (ზემო ჯავახეთი), სამცხე (ფოცხოვის ხეობა).